കവിത :കറുപ്പ് ,കെ എസ് മധു

കറുപ്പ്

കരിമ്പാറയ്ക്കറിയാമീ

കറുപ്പിൻ ദുഃഖം

കരിവീട്ടിക്കറിയാമീ

കണ്ണീരുപ്പ് .

ഇളം പഴുപ്പുള്ള ചൂരൽ

ഇലകളും മുള്ളുകളും

ഇളക്കി മാറ്റി,

ഇളം തീയിൽ വാട്ടി നല്ല

പതം വരുത്തി.

ഇരുമ്പിന്റെ കൂടത്തിന്ന്

പുതുക്കൈയ്യിട്ട്

കരിമ്പാറക്കൂറ്റനോട

ന്നേറ്റുമുട്ടി ക്കറുത്ത ദേഹം ,

കണ്ടു നിങ്ങൾക്കറപ്പു

തോന്നാം.

കറുപ്പിന്റെ വേർപ്പു വീണ

ചോറു തിന്നിട്ടെത്ര വല്യ

തമ്പുരാൻമാർ വെളുത്തിട്ടുണ്ട് ?

കാരിരുമ്പിൻ തഴമ്പുള്ള

കറുത്ത കൈകൾ

ചോറുരുട്ടാനറിയാത്ത

കഞ്ഞി വെള്ളക്കിണ്ണത്തിലെ

വറ്റു വാരി ശീലമുള്ള

കറുത്ത കൈകൾ

വെട്ടി മാറ്റിക്കറ്റകൊയ്യാൻ

കൃത്രിമക്കൈ തേടിയോർ നമ്മൾ .

തൊഴിലെടുത്താലവനെന്നും

തൊഴിലാളിപോൽ .

മുതലെടുത്താലവന്നു പേർ

മുതലാളി പോൽ .

( കെ എസ് മധു)