രണ്ടു കവികൾ രണ്ടു കവിതകൾ

നിലപാടുകൾ

റോബിൻ എഴുത്തുപുര 

തുന്നൽ നടക്കണമെങ്കിൽ

സൂചിയും നൂലും

ഇടപെടണം.

മൂർച്ചയുടേയും

ബലത്തിൻ്റേയും

നിലപാടുകളുണ്ട്

സൂചിക്ക്.

നീളത്തിൻ്റേയും

വഴങ്ങലിൻ്റേയും

നൂലിനും.

നിലപാടുകൾ

മാറ്റമില്ലാതെ

തുടരുകയും

നയതന്ത്രങ്ങൾ

പാളുകയും ചെയ്യുമ്പോൾ

മുറിവിൻ്റേയും

മുറുക്കത്തിൻ്റേയും

അകമ്പടിയോടെ

പിടഞ്ഞ്

മാഞ്ഞുപോകുന്നു;

തുന്നിവാങ്ങാനെത്തിയവരിൽ

ചിലർ.

റോബിൻ എഴുത്തുപുര: ഇടുക്കി, കട്ടപ്പന സ്വദേശി. കവി, നിരുപകൻ.jpm കോളേജ് - ലബ്ബക്കടയിൽ അധ്യാപകൻ.

       

         നാവ്

  മഞ്ജുനാഥ് നാരായൺ          

ഈറ കീറി പൊളിയടക്കുമ്പോൾ കരിമ്പൊളി മാറ്റിവെച്ചമ്മ പേടിയോടെപറയും. കുട്ടികളെടുക്കരുത് കരിമ്പൊളിയുടെ രണ്ടറ്റവും മൂർച്ചയാണ് കൈമുറിയും ചോരവരും. രാവിലെ ഉണരുമ്പോൾ അമ്മ കൈയ്യിലൊരുപിടി ഉമിക്കരിയും കരിമ്പൊളിയും വെച്ചുതരും പേടിയില്ലാതെ , നാക്ക് നന്നായി വടിക്കണമെന്ന വാക്കും വടിച്ച് വടിച്ച് നാവിന്നൊരു കരിമ്പൊളിയായി രണ്ടറ്റവുംമൂർച്ചയുള്ള കരിമ്പൊളി .

മഞ്ജുനാഥ് നാരായൺ. പത്തനംതിട്ട ജില്ലയിലെ തട്ടയിൽ സ്വദേശി. അമേച്വർ നാടക പ്രവർത്തകനാണ്. കവിതകളും ഗാനങ്ങളുംഎഴുതി വരുന്നു. ഇപ്പോൾ മലപ്പുറം വേങ്ങര ചേറൂർ ചാക്കീരി അഹമ്മദ് കുട്ടി മെമ്മോറിയൽ ഗവ:യുപി സ്കൂൾ അധ്യാപകനാണ്.