രണ്ടു കവിതകൾ :പ്രിൻസ് ഓവേലിൽ

വൈക്കോൽത്തുറു

വിളഞ്ഞെന്നറിയുമ്പോൾ
കൊയ്തുമെതിച്ചെടുക്കും

നെന്മണികളെടുത്തിട്ട്
കുടുമിക്കു പിടിച്ചൊരേറാണ്

വെറുതെയാകാശത്തേക്കു നോക്കി
മഞ്ഞുകൊണ്ടങ്ങനെ കിടക്കും

നെടുവീർപ്പിൻ്റെ നനവുകൊണ്ടൊരു
ഗന്ധമുള്ളിൽനിന്നുണരും

വരണ്ടുവിണ്ടപാടത്തേയ്ക്ക്
വെയിലുകൊള്ളാൻ നിരത്തിയിടും

കുഴിപ്പന്തുകളിക്കുന്ന പിള്ളാർ
ചവിട്ടിമെതിച്ചാർത്തുവിളിക്കും

ആരുമറിയാതെയൊരു പാമ്പ്
ഉള്ളിലേയ്ക്കിഴഞ്ഞു കയറും

മഴക്കോളൊന്നു ദൂരെക്കണ്ടാൽ
കമ്പുകൊണ്ടു തോണ്ടിക്കൂന കൂട്ടും

ഒറ്റത്തടിമരമൊന്നു കണ്ടുവച്ചിട്ട്
അതിലേക്കു വലിച്ചിഴച്ചുകൊണ്ടുപോകും

കെട്ടിയുയർത്തിയ പടങ്ങിലേക്ക്
വാരിവലിച്ചെറിയുമൊരാൾ

ചവിട്ടിയൊതുക്കി വെടിപ്പാക്കും
മുകളിൽ നിന്നു മറ്റൊരാൾ

തിരികവലിച്ചു ബലമുറപ്പിക്കും
മുകളിൽ ചട്ടിയൊന്നു കമഴ്ത്തിവയ്ക്കും

മരത്തെയിറുകെപ്പുണർന്നു നിൽക്കും
തലയുയർത്തി വിരിഞ്ഞു നിൽക്കും

ഇടയ്ക്കു വലിച്ചൂരിയെടുക്കാനുള്ള
ഓർമകൾപോലെയൊറ്റയ്ക്കൊരു
വൈക്കോൽത്തുറു

ചുവട്ടിൽ പൊഴിഞ്ഞതെന്തെങ്കിലു-
മുണ്ടോയെന്നു കോഴികൾ ചികയും

ഒത്തവണ്ണത്തിനു ചുറ്റും ‘സാറ്റേ
സാറ്റേ’ യെന്നുണ്ണികൾ പായും

അപ്പോഴും, പുരയ്ക്കപ്പുറത്തെക്കൂട്ടിൽ
നിന്നുമൊരമറലിലേയ്ക്കു മിഴിനട്ട്
ഒറ്റയ്ക്കൊരു വൈക്കോൽത്തുറു

…………………………………………………………………………………………………………………………………………………………….

1 ജനനം

ഒരു പയർവിത്തിനെ കാലം
രണ്ടായി മുറിക്കുമ്പോൾ
ഇളംപച്ചയിലകൾ രണ്ടെണ്ണം……

2 ശംഖ്

തിരക്കൈകളാലെന്നെ
തീരത്തേയ്ക്കെറിഞ്ഞാലും
ഉള്ളുനിറയെ നീ മാത്രമെന്ന്
കടലിനോട് ശംഖ്

3 ഗസൽ

ഗസൽഗായകൻ്റെ വീട്ടിലെ
കൽഭരണിക്കുള്ളിലിരുന്ന്
മുന്തിരികൾ പിറുപിറുത്തു
നീയെന്നെയൊന്നു
പിഴിഞ്ഞെടുത്തിരുന്നെങ്കിൽ
ഒരു മധുരമാം ഗസലായ്
പുനർജനിക്കാമായിരുന്നു

4 നിലാവിനോട്

നിലാവേ പിണങ്ങരുതേ
പുര കെട്ടിമേയലാണിന്ന്

5 വേരെവിടെ ?

ഉറവയോടു ചോദിച്ചു
നിൻ്റെ വേരെവിടെയാണ്
ഉറവ ആകാശത്തേയ്ക്ക്
കണ്ണുകളുയർത്തി

6 ഓർമയുടെ മണം

ഉപ്പുമാവിൻ്റെ മണമുള്ള നട്ടുച്ചകൾ
പ്രാർത്ഥനയൊന്നുമാത്രം
മണി വേഗമടിച്ചെങ്കിൽ

7 ചില്ലകൾ ഉലയുന്നത്

കാറ്റനക്കം കൊണ്ടുമാത്രമല്ല
തിരയിളക്കം കൊണ്ടുമുലയാറുണ്ട്
തീരത്തെ ചില്ലകൾ

8 ഉള്ളടരുകളിൽ ….

മഴയും മഞ്ഞും വെയിലും കാറ്റും
ചേർന്നെത്രയടരുകൾ
അടർത്തിമാറ്റിയാലാണ്
കണ്ടെത്താനാവുക
കരിമ്പാറയ്ക്കുള്ളിലെ
ജൈവഫോസിലുകൾ

9 ഓർമയുടെ നദി

ഇന്നലെകൾ പൊട്ടിച്ചിതറിയ
വഴിയിലൂടെ നടക്കുമ്പോൾ
പാദം മുറിഞ്ഞൊഴുകുന്ന
ചോരയെയാണ് ഓർമയുടെ
നദിയെന്നു വിളിക്കുന്നത്

10 ആത്മകഥ

കീറിക്കളഞ്ഞ പ്രണയത്തിൻ്റെ
താളുകളിൽനിന്നു പൊടിയുന്ന
മിഴിനീരിൽ നനഞ്ഞതത്രെ
ആത്മകഥയുടെ താളുകളെല്ലാം