കവിത : കുഴിയെടുപ്പ് 1 – ബിബിൻ ആന്റണി

അയാൾ
നിറകണ്ണാൽ വരച്ചത്
നമ്മൾ കൊതികണ്ണാലളക്കുമ്പോൾ,
കാലമിതെന്ത് ഈ പടത്തിൽ
കുഴിച്ചുനോക്കുന്നു?

 
ഹേഗിൽ 2
കുഴിവെട്ടുന്നവർ:
പലനിലകളിൽ
പലമാത്രയവരെ
കരളിലും
പിന്നെ ക്യാൻവാസിലും
കണ്ണീരാൽ
വരച്ചയാൾ.

 
മൺവെട്ടികൾ; അവർ
പാതി ഇരുട്ടിലും
പാതി മണ്ണിലും,
മനസ്സിലോ മുഴുവനും
മരിച്ചു പോയവർ.
അവരെ വരക്കാൻ നിറങ്ങളയാൾ
ഇരുട്ടുകൂട്ടിക്കുഴച്ചു,
വെളിച്ചമല്പം ചാലിച്ചു.
ഇരുട്ടിൽ,ഖനിയിൽ
ചതുപ്പിലാഴ്ന്നവർ
വരപ്പിലയാളിൽ
ജ്വലിച്ചു.
 
അയാളുടെ വിരലനക്കങ്ങൾ
ചരിത്രവേഗത്തിൽ ചായങ്ങളുടച്ച്
വരപ്പുകളെ വീർപ്പിൻ
നിഴലാട്ടത്താലുഴിഞ്ഞു.
 
നിരന്തരം
മനുഷ്യരെയോർത്ത്,
ഒഴിഞ്ഞുപോയോരുടെ ഇരിപ്പിടമോർത്ത് 3
മണ്ണിൽ, ഖനിയിൽ
ശ്വാസമറ്റോരുടെ
ശമിച്ച ദാഹങ്ങളെയോർത്ത്
ഇരുണ്ടനിറങ്ങളായ്
അയാൾ കരഞ്ഞു.
 
അയാൾ കരഞ്ഞു,
ഒറ്റയ്ക്കൊരു ചിത്രമായ്
നിറമുണങ്ങുംവരെ, 4
മുറിവാറുംവരെ,
ചെവിയിലോടിയ തീവണ്ടികൾ
ഛിന്നഭിന്നമാകുംവരെ,
ഒറ്റക്കസേരയിൽ
ഒരു മുറിയുറങ്ങുംവരെ, 5
കഠിനരാത്രിയതിൻ
കോടിക്കണ്ണുകൾ തുറക്കുംവരെ, 6

നെറുകിലുന്മാദത്തെ അയാൾ
വെയിലായ് വിളയിച്ചു.
മഞ്ഞയായ് നീലയായ്
നിർമമനിറങ്ങളാകെ തെളിയിച്ചു.
 
ഉഴവിലുൻമാദിയാം മൃഗത്തെപ്പോൽ ഇരുട്ടിനെ,
ഊർവ്വരചിത്രങ്ങളായ്
പുനർജനിപ്പിച്ചു.
 
കുഴിച്ചയാൾ മരിച്ചു,
വരച്ചയാളും.
പടത്തിലായത് കുഴിച്ചുനമ്മളോ-
ഇരുട്ടളക്കുന്നു…
ചരിത്ര വിടവടയ്ക്കുന്നു.
പടത്തിലയാളുടെ മുരിക്കുപാടിൽതൊട്ട് 7
‘എന്തൊരു വരപ്പുകാരനെന്ന്’
എന്തൊരു മനുഷ്യനായിരുന്നെന്നതിനേക്കാൾ
ഉറക്കെ വാഴ്ത്തുന്നു.

പടത്തിലപ്പോഴും
അയാൾ വരച്ചയാൾ
മടച്ചുകോരുന്നു,
കുഴിയെടുക്കുന്നു.

1. വിൻസെന്റ് വാൻഗോഖ് വരച്ച ‘Man digging’ എന്ന ചിത്രം
2. നെതർലാന്റിൽ വാൻഗോഖ് ജീവിച്ച പട്ടണം
3. വാൻഗോഖ് വരച്ച ‘Paul Gauguin’s Armchair’ എന്ന ചിത്രം
4. വാൻഗോഖ് സ്വയം വരച്ച അവസാന ഛായാചിത്രം
5. Starry night